Цахим тэмдэглэл

     Халуун ус тасарчихлаа. Тасраад 4 хонох гэж байна, энэ хооронд хүйтэн усанд орж эрийн шийрээ шалгах гэж үнэнхүү хүнд юмаа. Уул нь цаанаасаа мэдээлэхдээ 7 хоног халуун усыг хаана гэдэг ч энэ хугацаа нь дор хаяж 14 хоног болж уртасдаг. Хаа нэгтээ халуун ус түгээх шугамд хагарал гарсан тул тэрнийг нь засч дараа жилийн зун хүргэхийн тулд газрын хөрснөөс доош 4 м орчимд булсан шугамандаа урсгал засвар л хийнэ. Нэг мөсөн засч янзлах юм бол дараа жил тэрийг нь засах мөнгөнөөс хэн нэгэн том дарга нь цохиж чадхаа больчихно.
Тэр булсан шугам дээгүүр нь ихэвчилэн явган хүний хучилттай зам тавьсан байдаг. Засаад дууслаа гэхэд ухаж сэндийлээд, тухайн дүүргийнхний тохижилт үйлчилгээний төвийнхний хөлс хүчээ шингээн байж хийсэн нөгөө сайхан явган хүний замаа эвдээд шороон овоолго л үлдээнэ. Ингэж өөрөө юм хийхдээ бусдын хийснийг үл тоомсорлон эвдэж сүйтгэж л орхионо.


     Наадмын өдрүүдээр нөгөө шугам холойгоо засах гээд "Багшийн дээд" -ийн урд талын туслах замыг ухсан нь одоо ч хэвээрээ, хуучин байсан шиг нь хатуу хучилттай зам тавьдаггүй юм аа гэхэд ядаж ухаад гаргасан шороогоо тэгшилж болдоггүй л юм байхдаа. Манай оронд ямар нэг ажилыг эхлүүлэхдээ нэг л их сүр дулиан болгодог ч өрнөл явцдаа ажилын бүтээмж удааширч, бүр тэгсээр дуусгаж чадахгүй мартагдаж орхих юм даа.